Način pri vseh premembah sveta ovoga po premišlavanju previdnosti božanske sebe vpokojiti.
Premišljavanje I.
Odgovor na pitanje kak se vu opčinskeh zmutnjah i traplenjih zadržavati moramo da se pokoj naš ne razmeče.
Vučili jesmo zgora da najsegurneši način stalnoga i trpnoga na svetu ovomu pokoja vživati se je od previdnosti božanske vputiti se i tvrdno veruvati da ona ovde vse dogođaje ravna. Zato smo vu prvi ove knjige strani pokazali da božanska previdnost je. Vu drugoj rastepli smo dvojmbe koje se proti njoj navadno delaju. Vu ovoj tretji ov navuk poprimemo da se vu vseh premembah sveta ovoga vpokojimo ter da tam dospemo, prva skrb naša bude pokazati kak se vu opčinskeh nesrednostjah i suprotivčinah ponašati moramo. Ovo bude zavjetek odseka ovoga.
Čujmo još prituženja ljudih kojeh pokoja burka nevoljnost opčinska predi kak im prepišemo načine po kojeh se nepokoja ovoga oslobodiju. „Vu kuliku prepast ne stavljamo mi duha našega! Kakovem se ljutem vetrom i vihrom ne podmečemo!“, čuti je od vseh stran nikaj drugo kak prituženja i morguvanja. „Ves svet ov je spodoben morju koje se navek burka. Sreča, nesreča slediju neprestance jedna za drugum. Kuliku opčinsku nevolju vu živlenju ovem trpeti moramo! Kak velika je to nevolja, kak ljute i vnogovrsne suprotivčine! Jedno kratkočasno henjanje je prethoditel velikoga zburkanja! Za malem veseljem sledi zvekšinum najkrvološneše trplenje.“
Pritužujte se, nepokojne duše! Zlehkotete srce vaše, izlejte žalost koja vas vmarja, dokončajte ispis nesreče vaše.
Gdo more, rečete, prez suzneh očih gledeti premembu koja celi orsag zatira i skančanje vsega puka zrokuje? More li poljodelavec mirovno gledeti vihre, burkanje zraka ali vnožinu nesnage koja njegve žetve mentuju?
Ljudstvo trpi glada, dražina se raširuje, ide puk vse malo po malom na nikaj, kužni betegi i kuga k tome pridojdeju i čez malo napraviju iz jako obilne okolice puščinu, vu tak tužneh okolicah pokojnomu ostati, je naravi silu včiniti.
Z ovemi zli koja nas opstiraju i kojem se vugnuti ne moremo, zjedinuju se mrzenje i svade med ljudmi. Jeden puk navaluje na drugoga z oružjem vu rukah, vse pod nikaj meče koj mu goder na putu naprv dohađa. Vsikud vidiju se varaši i sela vu plamnu. Polja nikaj ne pokažuju nego puščinu. Na kup nesreče višeputi krivičen zmutitel mira biva obladavec i nedužni biva aldov tak vnogeh porušenjih i straha. Jednoga Aleksandra želja obladanja celu grčku zemlju i Aziju vu ogenj i plamen postavlja i ovi veliki orsagi su aldov oholnosti ovoga obladajučega viteza postali. I nazlob dveh kraljev višeputi lestor po krvi od miliona ljudih vtišiti se more. Pače, kada se mira vživamo, još se nemirnosti naše ne dokančaju: vidimo večput z turobnostjum da se države po osobah ravnaju kotere niti zaslužbe, menje kreposti na ovu zmožnu čast podignule jesu. Veliko ime, obilnobrojni službeniki, oružje zrok su njihovoga izvišenja bila i, kaj još več je, ime domovine je im neznano, pravica ravna se poleg njhoveh poželenj. Kakve blaženosti od poglavarov ovakveh moči se je ufati koji su se za krivicu zaprisegli, koji niti razuma niti kreposti imaju i koji Boga bantuju. „Krivica celoga orsaga dopelja na opustenje.“ (Knjiga mudrosti V. del 24. red)
Prestanete se prituževati, nepokojne duše, koji ljubite domovinu koje nevolja vas žalosti! Pretrgnite vaša prituženja da z trplivnostjum posluhnete kaj mi ljubav podaje da vas vu pokojen stališ nazad dopeljam i nepokoj iz srca vašega pretiram.
Valujem da suprotivčine pri prvom pogledu dušu našu zburkaju kajti mi stvari kak su vu sebi premišljavamo i ne podižemo mišlenja naša tja do Boga koj sveta celoga ravna. Kada ladja na zburkanom morju brodi i slapi se od ljuteh vetrov napuhnjeni zvrhu ove podižeju ter nju vsaki hip požreti nagražaju se, lehko se vsi koji su na nji od straha prevzemeju. Nego ako gdo vu ovoj veliki sili ladjoravnitela premisli ter se opazi da se on veseloga i neprestrašenoga kaže i da se njegvem zapovedjam i znamenjam koja on daje vse podlaže, tak se ne bude ali nikakova zufanost vu njegvu prikladnost i veščnost postavljala ali strah ves nepazeč na ovu nadospevajuču pogibel iznikne.
Valujem da se gdagda na svetu vse tak zmučeno vidi da bi mislili da su vsi ljudi za poginuti gotovi. Kada se morje na tuliko burka da bi reči da zmed svojeh krajov izide, potres zemlju steplje, cele varaše ruši i pod zrušenemi stanji nesrečne stanovnike zakapa. Kada kuga orsage opušča, vse se smrt vidi, ali nju nazveščati. Je li pako ni Bog koj vu oveh strašneh hipih nebo i zemlju gibati se pušča? Ne li on koj oblake skup zbira, koj vetre puhati pušča i z zemljum trese? Ako pako on vsigdar dobro celoga sveta preskrbljuje, zakaj nas ove naravske nesreče nemirne čini pokehdob su zrokuvane od Boga koj tečaj narave je naredil?
Ne menje moramo se vu dogođajih koji od slobodne volje ljudih visiju k Bogu podignuti i vu odlučkih njegve mudrosti zvirališče našega mira i pokoja iskati. Tabori i vse kaj opčinski mir zmutiti more, jesu opravek božanskoga prepuščenja i ovo je poleg mudroga odlučenja Vsamogučega da se orsagi opuščaju, da se varaši zatiraju i ljudi pod nikaj idu. On višeputi dopušča da za ravnanje nevredni hercegi na stolici jesu, da se po krvoločnosti trapljeni narodi proti pravednem poglavarom spuntaju i ovo su turobna ona zvirališča zatiranja orsagov i varašev. Mudra volja božanska koja vse ove dogođaje ravna, naj naš pokoj zdrži.
Morati je znati da nijeden človek za se samoga ne žive, nego da Bog človečansko društvo vpeljal je da si med sobum pomoč iskažeju (poglej dela drugoga premišljavanje tretje) zato je varaše i sela naredil da stanovniki svoje opčinsko dobro preskrbluju i jeden drugomu vu svojeh potrebočah pomore. Da se pako iz istoga cilja jedno zvršeno združenje med varaši i seli vtvrdi i pripomore teškočam koje zarad međih bi bile mogle iziti, da se trgovina zlehkoti ter putnikom seguren i lehkek put pokaže, spravil je skupa stanovite varaše i stanovita sela iz kojeh država i iz oveh zjedinjeneh držav cela kraljestva je načinil. Dal je njim hercege i gospodu da se ovi za zvunski red i mirnost varašev, orsagov i kraljestvih skrbiju.
Bog pako previdel je da posebno dobro jednoga plemena i opčinsko dobro kraljestvih i orsagov ne opstoji dugo vu dobrom stališu i da se ova z zločami napuniju. Previdel je da se opčine, kak na najmudrešeh zapovedjah vtemeljene, po svojoj lastovitoj sreči porušiju. Zato je poleg svetosti svojega tolnača dokončal da kraljestva ljudih ne budu stalna da bi jednako odlučenje imela i da ono kaj ljudi sreču ali nesreču imenuju ne bi jednoga orsaga lestor delničtvo bilo, nego med orsage razdeljeno bude, kak najmre vreme, mesto i okolnosti bi potrebuvale. Ovoga razdelenja ono isto odlučenje je kak je onoga koje med ljudmi biva kajti Bog one iste zroke ovde nahađa. On podiže nekoje orsage, druge ponižuje, nekoje zmed oveh bogate, druge siromaške čini. Ali on je, kak David veli, pravičen vu vseh puteh svojeh i svet vu vseh svojeh poslih.
Nestalna sreča nam vsaki dan nove ishode naprv stavlja. Šip zapuhne, neprijatel se zbira, približava se i celi puk dospe pod drugo ladanje. Neprijatelske čete su kakti, tak rekuč, kola na kojeh Bog sreču i čestitost pukov vu druge kotare prevaža.
Kada Bog poleg svojeh pravičneh dokončkov kraljestva na druge prenesti ali mogučnost i sreču kakvoga orsaga slabiti i oholnost njegveh stanovnikov poniziti hoče, on si navlastito k tomu po taborih služi. Kak se goder nam ovi krivični vidiju, vendar nje Bog za hmanjicu ljudih kaštiguvati potrebuje. Orsag, kojega Bog z bičem tabora pohoditi hoče, naj vsu previdljivost izišče, naj velike šerege skup zbere da neprijatela dalko nazad otira, konjaničtvo naj bude đeđerno i obilno, pešci tak čvrsti kak je zid, vse nikaj ne pomore ako Bog njegov ni branitel.
Izveđajmo bližneše zroke iz kojeh porušenje orsagov ishađa. Premislemo kaj Bog čini za poniziti gizdost stanovnikov kotere sreča zevsema oholne je činila.
Orsag se zatere ako njega ladavci božanske i človečanske zapovedi pod pete mečeju, ako z pravičnostjum i razumnostjum ne ladaju, ako se oholnosti povdavaju i krivične boje začimljeju.
Orsag na skančanje ide ako oni koji z opčinskemi posli optršeni jesu i podtpornja ladavcev, svoje gospode, bi morali biti, nikakve znanosti nemaju, opčinsko dobro zapuščaju, pravu hasen kraljestva koje ravnaju ne znaju, zapovedi prez spunjenja puščaju i lastovitu lestor hasen iščeju. Spoznanje pokažuje ovu istinu. Kaj je više k porušenju kraljestva izraelskoga doprineslo kak nerazumni sin mudroga Šalomona koj na tolnače oca svojega čisto nikaj ni pazil.
Orsag mora pod nikaj iti ako se oni koji oblast vu rukah imaju, takove ne vživaju za pravicu podeljiti, ako za segurnost i dober red varašev sebi zaufaneh ne skoznuju. Orsag mora se čisto skončati ako vođe koji šerege pod sobum imaju nikaj od vojoznanstva ne znaju. Dužnosti jednoga vođe ne razmeju, nikakvo oštro v redu držanje nemaju i mehkotelni ter za dobičkom pohlepni jesu.
Ovak su vsa kraljestva na nikaj došla od kojeh se lestor jošče vu pismih dogođajev nekoji sledi ne nahađaju. Koja pako zevsem nesu skončana, jesu se takovem načinom vse svoje dike i glasovitosti mentuvala. I zato vi, kojem zatiranje državih na srcu leži i koji nad skončanjem ali končemar nad pomenšavanjem oveh genjeni jeste, kome vse ove nesreče pripišete? Ako lestor na bližneše zroke pazili budete, vsu opčinsku domovine sreču nestalnosti, krivičnosti ladavcev i tolnačnikov ter zametanju zapovedih pripišete. Ali morate vaše misli više podignuti i opazite da su ovi načini koje Bog potrebuje kad kakov orsag pohoditi i njega čestitosti, koje se neobične vživa, menutvati hoče. Vsamoguči očituje da orsagi i kraljestva lestor po njegveh tolnačih i njegovoj skoznjivosti opstaju. Anda se po njegvi lestor volji kraljestva skančaju po oneh najmre četireh zrokih koje smo naprv donesli: „Po meni kralji ladaju i zapovedniki određuju kaj pravo je, po meni gospoduju hercegi i oblast imajuči spoznavaju pravicu.“ (Knjiga prirečjih VIII, 15). Ako kralji mudri osraga ravnaju, ako su viteški, pravični i velikosrčni, veselete se zbog toga, ali podignete se k prvomu početniku od kojega oni vse ove retke kreposti dobili jesu. Bog koj orsaga ljubi kojega takovi hercegi ladaju, ove nad njim oblasnike je postavil. Po meni kralji ladaju i oni ladaju tak razborno da orsag vu dobrom stališu bude. Suprotivnem načinom kada Bog izraelsko kraljestvo zatrti hotel, postavil je za kralja zvrhu puka svojega nerazumnoga Roboama. Bog hoteči kraljestvu gotov konec včiniti, zaufal je kraljevskoga bata Roderiku koj po svojoj krvoločni čudi i lebudnom živlenju vsu jakost ovoga puka zatrl je.
Ako tolnačniki kraljestvo z prigledbum i razborno ravnaju, ne prepišujte prvi zrok njim, nego Višnjemu ar po njem, to je po njegvom duhu i njegvoj oblasti, ladaju hercegi i oblasniki spoznavaju pravicu kak Šalamon veli. Ako vidite da se ljudi kojem na razumu i presuđenju ne menjka, za nespamente tolnačnike kažeju, zmislite se Akitofela kojega tolnač Bog na bedastoču je premenil kada ga je David prosil da bi srce Absolona vkrotil (2. Knjig. kraljev XV, 31). Ne čudete se ako najmudreša naređenja od hmanjeh za nemar držati i poteptavati vidite. Ne štimajte da to pripečenje je Bog prepuščal da se takovi zločesti tolnačniki, kak su oni bili koje Roboam je poslušal kada izraelsko kraljestvo razdeljeno je bilo, nastaviju.
Z tem se je Bog Šalomonu grozil kad mu je rekel: „Kajti moj zakon i zapovedi moje obdržaval nesi, hoču kraljestvo tvoje rastrgati i razdvojiti i dam ga slugi tvojemu. Medtemtoga neču taki u tvojeh dneveh za volju tvojega oca Davida to činiti, nego hoču nje iz ruke sina tvojega strgnuti.“
Ako se kraljestvo po dobreh vojnikih brani, ako dobre vođe i đeđerne oblasnike ima koji potpunoma naredbe vojničke obdržavaju ter od drugeh obdržavati skrbiju, ne štimajte da oni svoju đeđernost od sameh sebe, ali samo pripetlivem načinom imaju. Ne daje li Bog jastrebu perje i ne pušča li orlu peruti i parklje rasti? Ako Bog hoče da orsag vu cvetučem stališu i proti trsenju neprijatelskem vu segurnosti je, daje šeregom đeđernost i jakost. Suprotivno ako Bog hoče da varaš oslabe ali na nikaj dojde, pomenjša on naravsku srčenost pukov, vođe živeju vu neslogi i jesu nemarni, đeđernost vojnikov znikne, postaneju plahi. Ar njegva je oblast i po njem ladaju kralji i vođe.
Sveto pismo potvrđava istinu ovu po peldah. Kak Izraelci Bogu nesu pokorni hoteli biti, je se njim z celem zatiranjem grozil ako se njegvem zapovedjam ne podložiju i obznanil je njim načine z kojemi si služil bude. „Odvrnem obraz moj od vas“, veli njim Gospon, „i budete padali pred vašemi neprijateli i sužni postanete oneh koji vas odurjavaju. Bežali budete kada vas nigdo niti ne bude preganjal.“ (5. Knjig. Mojžeša XXIV. 17). Još se otprteše očituje vu redu 36. „Hoču takaj onem koji zmed vas zvrhu ostaneju, straha vu srca njihova dati vu orsagu neprijatelov njihoveh, šum letečega lista naj nje straši i naj beže pred ovem ne drugač kak pred mečom, naj tulikajše opadneju kada je nigdo ne preganja.“
Svetski dogođaji takaj istinu ovu nam zadovoljno pokažuju. Ako na nje oči hitimo, kuliko ih ne najdemo? Rimsko cesarstvo moglo bi nam od toga stanoviti pokaz dati. Cela Europa pred ovem samoladavstvom vu strahu je bila. Imalo je kruto obilne, vešče i obladati vadne šerege. Neglasoviti vendar su i neznani narodi strahovito ovo kraljestvo rastepli. Strah i plahost pred njimi su išla i obladali su junački ov narod koteri nigdar nikomu vu đeđernosti i srčenosti niti vu najmenšem ni pustil. Otkud dohađa tak velika prememba? Zakaj ne vojuju več Rimljani kak Rimljani? Zakaj nesu več obladavci koji tulike pokaze dali jesu da su meštri vu vojoznanstvu? Otkud dohađa da su nadladani od divjeh i krvoločneh narodov koji zaisto akoprem obilni na broju, vendar prez držanja, vojoznanstva i prez reda bili su? Strah i bojazlivost srca Rimljanov prevzela jesu ter iz njih đeđernost i razbornost pretirala. Bog koj kraljestvo ovo zatrti je hotel, je oroslansko srce puka ovoga vzel i nje krvolokom ovem predal.
Ako pomenši poglavari nad obdržavanjem zapovedih skoznuju i za blaženost pukov skrbiju se, tak Bog je koj po njih čestitost orsagov i varašev zdržati hoče. Ako pako suprotivnem načinom poglavari ovi dober red zapuščaju, zloče nekaštiguvane ostavljaju ter krivicam se povdavaju, tak znajte da Bog ova prepuščajuč države kaštiguje.
Zdihavamo višeputi da Bog prepušča zla koja zatiranje orsagov zrokuju, krivimo preizvišeno sopstvo i vu srcu velimo: „Zakaj na nikaj meče jedno kraljestvo da drugo obogate? Zakaj se vsi mira i jednakoga pokoja ne vživaju?!“ O, nerazumni človek, rad bi vre i pak čine Boga tvojega pretresati? Štimaš da on vražuje svoju božansku pravicu kada on tak barače? Hoče on preveč veliku čestitost vkrotiti kotera je hmanjicu povnožala. Je li te moreju odlučki Vsamogučega žalostiti? Pokazali smo gore i moramo vpučeni biti da na svetu ovom vse poleg određenja i po prepuščenju božanskem biva. Zakaj drugač velimo: „Otec naš, budi volja tvoja, kak na nebu i na zemlji.“ Zakaj se žalostimo kada Gospon domovinu kaštiguje kak da ona vse ove kaštige ne bi bila zaslužila? Krhkoča človečanska ne dopušča da orsag koj vsevdilj vu jednakom stališu sreče opstoji kajti pravica božanska zlo nekaštiguvano ne more ostaviti. Gde je pako koj kotar gde služba Božja i krepost tak lada da se onde nikakova zloča ne bi delala. Premda se zvuna vidi da stanovniki straha Božjega imaju, da su razborni i kreposni, višeputi vendar se nahađa da hmanje, zlobno i pohabljeno srce imaju. Oni koji po dnevu krepost sleduvati vidiju se, puščaju se višeputi po noči vu zloče štimajući da se njhova sramota z tmicami zakrije. Bog pozna nuternja človeka, on zna mišlenja njegova. Zato ne krivemo Boga, nego stanovnike orsaga kojega on zaradi njihoveh zloč kaštiguje.
Ne pretresavajmo tak jako domovine zlo da ono preveč genutljivo premišljavanje naš pokoj ne zmuti i nas ne preči oči na Boga hititi koj kaštiguje i svoju pravicu zvršava kajti on ljudi rad ima. Kada človek oči svoje vu kolo vupre koje se z velikum hitročum okolo svoje osi obrača, njegvo gibanje vida zmeša. Premembe sreče i čestitosti jesu vnogo hitreše i nagleše kak da se mirno premišljavati mogu. Ako se nevolje i traplenja domovine pregledaju i njejine zatiranje živo naprvostavi, tak nas premišljavanje ovo gene. Zato se trsete oči od oveh turobneh stvarih odvrnuti, pače podignite srce vaše k Bogu, premišljavajte ljubav njegvu, batrivo ovo naprvstavljanje nepokoj vaš oblada i zevsema otira. Podnašajmo trpljivo vse kaj nam Bog pošilja i ne tužemo se proti tomu misleči da grehi naši još več zaslužili jesu. Gospone, mi te vu našeh suprotivčinah iskali budemo ar kaštiguješ koje ljubiš.
(Način vu vseh živlenja dogođajih vsigdar zadovoljnomu biti 1826: 140 – 154)