Kad bi se nekoj muž z Ciganom za konja bil pogađal, pital ga je ima li kakvu falingu. „Druge falinge nema“, rekel mu je Cigan, „samo kaj na drvo neče.“ Mislil si je muž vu sebi: „O, ti šupla glavica, pak kad si videl konja na drvo iti!“ Ali za kratki čas je spoznal da je Cigan imal prav kad je rekel da konj koga mu je prodal, na drvo neče. Ar kad bi na njem domom jašuči do jednoga mosta bil došel, konj nikak se nije dal na most akoprem je na njem vsega korbača strgal i jednu ostrugu potrl. Zato povrnul se je nazad k Ciganu, koga je na sreču pod sencum pri lagvu sedečega našel, i na njega mrsko navaleči, rekel mu: „Čuješ, Cigan, ti si me vkanil. Rekel si da ov konj nikakve falinge nema, pak vendar kad do mosta dojde, ne da se prek ako bi ga taki z nožem parat. Zato ovo ti ga nazad, a ti moje novce marljivo nazad povrni.“ Cigan mu se nasmeje i veli: „Kaj nis rekel da druge falinge nema, samo kaj na drvo neče?“ (Danica zagrebečka 1838: 106)
Svetki gibuči i negibuči ovoga leta
Svetki negibuči zoveju se oni koji nigdar od svojeh sebi vre od svete matere Cirkve odlučenoga dana ne odstupljuju. Ovak na priliku Božič je svetek negibuči kajti navek na 25. grudna opadne. Svetki pak gibuči jesu takvi koji svoje dane vsako leto menjaju. Ovak vu peldi Vuzem je svetek gibuči kajti negda raneje, negda pak kesneje dohađa. Ali letos red ov čisto premeni se, pak svetki koji su predi bili negibuči, gibljivi postaneju kajti vnoge dobre krščenike iz doma vlekli i v cirkvu k meši i k prodečtvu gibali budeju. Suprotivnem pak načinom svetki predi bivši gibljivi, letos premeniju se na negibuče kajti vnogoga vsi zvoni genuti ne budu mogli da bi se na njihov dan vu cirkvu iti odlučili.
Koj ne bude imal kaj jesti, on bude na sam Božič i Vuzem ovo leto postil. Koji pak budu imali z čem nahraniti se, niti na isti Veliki petek ne. Iznimlju se vendar oni pobožni koji iščeju najprvič Kraljestvo Božje i pravicu njegovu i potlam stoprv počmeju misliti kaj budeju jeli i kaj budeju pili i z čem se budeju opravljali.
Letos budeju kvatri samo za redovnike i fratre. Neg i od drugeh dobreh krščenikov je nijeden, to znam dobro, ne zatre.
Korizma ovo leto pri nekojeh bude cela. Pri nekojeh samo zadnji tjeden trpela. Koji pak za svoju nikaj ne daju veru, oni si baš i za korizmu puno glave ne teru.
Vučeni jesu se od toga dugo vremena med sobum pravdali je li je najmre naša Zemlja na koji mi živemo, čisto okrugla ali pak samo okruglasta, onak na priliku kak je jajce. Za dugem pregovarjanjem vu tom se najzadnjič vsi do jednoga jesu pogodili da od svet nije na četiri vugle i da leto dvanajst mesecov ima. Ravno tak i ovo su znašli da kajgoder ima početek, tukajše i konec imati mora. I da novo leto ne more se započeti prvlje, nego se staro dokonča.
Vu istoj priliki dok su skup sedeli da z mudrovanji svojemi svet obogatiju, leto na četiri stranke, najmre na protuletje, leto, jesen i zimu jesu razdelili i od njih gatali da za nevaljane ljudi i zločeste gospodare ne budeju baš jako pridne i najboljše. Kaj takaj i to da on koj vse četiri stranke prežive, bude za jedno leto stareši. Zadnjič su dokončali da Mesec kak se god nam velik vidi, ne važe više kak samo jeden funt pokehdob četiri frtalje ima. I z tem su se razišli.
Od Meseca i letošnjega planete
Mesec, kak je malo predi rečeno, ima četiri frtalje, otkud, kajti se mesec na leto trinajstkrat menja, gospoda P. T. iglobodci koji se zevsum silum opravomerniki (Kleider-Ingeniurs) zvati hočeju, ispeljati trsiju se da leto nije, kak zvezdari misliju, 12 mesecov neg 13 refov dugo. To pak oni ovak dokažuju: 13 refov, vele oni, iznaša vuprav 52 frtalje, a vsaki frtalj čini jeden tjeden. Kajti pak leto ima 52 tjedne, anda ima i 52 frtalje pokehdob tjedni iz frtaljov bivaju. Vre pako 52 frtalji činiju 13 refov, anda leto, kajti takaj 52 frtalje ima, je dugo 13 refov. Sad naj jošče gdo reče da i gospoda iglobodci argumenterati ne znaju.
Jako se pak varaju vsi oni zvezdari i kalendarov složiteli koji za letošnjega planetu Marsa postavljaju. Da su oni rajši rekli da kraljujuči letos planeta bude Venus, onda bi ja njihovu znanost pohvalil.
Celo Sunca i Meseca pomračenje vu našem horvatskem orsagu bude onem samo vidljivo koji vu kleti ali pak vu krčmi do 25 srablivcev dotiraju. Koji pako samo 12 peharcev ispiju, taki budeju lepo zračno skazanje, najmre parhelijuša ili pak paraželene videli, iliti: njim se iz jednoga Sunca troje, a iz jednoga Meseca četiri meseci prečiniju. I tak druge stvari vu njihoveh očih vse se povečstručiti hočeju.
Ovo leto, kaj je čuda vredno, bude sneg sred leta i sred najvekše vručine padal i to pri oneh samo hižah gde se kukuruza vejala ali opčinjala bude. Mraza po glavi sedeh starcev bude celo leto dosta.
Tuče ovo leto dosta bude, najmre po školah, zatem pred varaškemi i varmeđinskemi hižami itd. Ali jaj si ga onomu, na kojega turo se zruši kajti ga tak zmlati i ščrba da mu budeju celi falati krp iz prknja doli viseli. Ako pak koj otec ali mati svoje dete z šibum jedno mal prepuca, to bu samo solika.
Ovo leto dva vetri, najmre zgorec i zdolec budu največ vojuvali. Zgorec pri oneh kojem se odzgor, zdolec pak pri oneh kojem se odzdol od jestvin koje rade napinjaju, spuhavalo bude.
Drugač ni navada da bi pri nas po zimi grmelo, a još menje da bi treskalo. Ovo vendar leto bude takvo da se i po zimi bude strašno grmeti i treskati čulo. Kad najmre zel muž na svoju ženu ali pak pijani gospodar na svoje hižnike i družinu vikal i larmal bude, onda bude grmelo. I kajti srditeh žen je povsud dosta, zato bude ovo leto i treskavic prez broja. Ova pak nastane kad takva srditka ošto vrata za sobum tresne. Kajti pak kad grmi, onda rad se i dežđ zleva. Zato kad gde vu koji hiži velika halbuka podigne se, onda zajedno iz očih vnoge mehke i čutljive ženčice tihi i topli dežđek spusti se.
Od vremena ovoga leta vu opčinskom
Kaj se vremena ovoga leta vu opčinskom dotiče, to jedino je znati da o Božiču ne budu vrane od vručine zevale niti se pak o Ivanju peči kurile zvun onda samo kada se bude pri koji hiži kruh pekel.
Ovo leto bude jako dobro i ze vsem bogato i oblino. Kaj se sada dotiče, med jabukami budu one najrodneše koje se srčike zoveju i koje iz prepovedane ljubavi cveta porađaju se. Ove jabuke nisu zločeste duhe zato je nekoji radi pridihavaju i kad je človek zagrize, činiju se tečne i slatke i reči bi da od njih na svetu več nikaj boljšega nije. Ali vendar ova hvala njih nejde, jedno zato kajti ne daju se dugo čuvati iliti nisu za stališ. Drugo kaj je baš jako ne preporuča, je to kajti več pod zadnje rade ogorčaju iliti žuhke postanu. Principium scilicet dulce est, ast finis amarus amoris.
Zmed hrušek črnice i šterfički letos dobro obrodiju kajti takveh dost bude koji se z glavum ali vu stenu ali vu gredu ali vu vrata jekneju ali pak na led opadneju kakti na priliku dijačinci kaj se budeju skozali ili sanjkali i tak na čelu šterfička ali črlenicu hrušku dobiju.
Modric sliv, koje se drugač bistrice zoveju, takajše ovo leto ne bude menjkalo kajti znam dobro da koj taj muž svoju ženu ali pak majstor svojega dečka po plečih vse do črnjavkih i modric izbije.
Jagode po nosu i po licu pijancev i pijankih letos lepo črlenele se budu. Neg takajše i dost časa za dozreti čez celo leto budeju imale.
Kaj se gliv dotiče, njih letos od one samo fele vnožina bude koje se nore zoveju kajti poleg svedočanstva mudroga Cicerona: „Stultorum plena sunt omnia.“ Ipak jeden drugi veli:
„Credere si rultis, nundus scatet undique stultis;
Naris stultorum navigat omne forum.“
Nit rib ovo leto ne zmenjka. Največ pak bude oneh kurtasteh koje se drugač belke zoveju, kaj takaj pisaneh šaranov. Ali z ovemi, kajti nisu tak skupe i lehko dobiti se moreju, samo priprosti častili se budeju. One pak z rogami iliti vizovina, kakti preštimaneša, bude za vekše stole.
Kukcev najmre takveh koji se radi na ruki delaju i svoje zlo višekrat do sklučenja prstov tirati znaju i letos nefaleno bude. Ali Bože, odvrni ti ovu strašnu kaštigu od kotrigov našeh! Kuliko pak je jadoviteh žen po svetu, tuliko i kač i tuliko zlateničneh mužev koji od srditosti taki pozeleneju, tuliko letos guščarov bude.
Od ostale letošnjega leta živine
Letos bude takaj puno strašljiveh zajecov, zgrabljiveh vukov, jalneh cuckov, ljuteh oroslanov, nečisteh svinj, bedasteh oslov, gizdaveh pavov, nemirneh mišov itd.
Letos bude povsud jako svet beteguval, ali od toga g. vračiteli i apotekari ne budu nikakve hasne imali. Vu Argentangini betežni ležali budeju vsi oni koji su preveč na visoko toporišče nasađeni. Hydropim iliti vodeni beteg dobiju nekoje lepe koje ne budu hotele dobro doma čuvati. Ove iste opadneju vu Lypothymiu iliti omilavicu kad žalosnu dobiju poštu da njihov dragi z kojem su se ufale srečne postati, je kruha pogubil ali pak vu skrovenem betegu postavljen teštament tela. Palpitationem Cordis iliti Herzklopfen, kaj se po horvatski „naglo i jako srca treptanje i tučenje“ reči more, čutili budeju vsi jako zaljubleni. Chiragru iliti vuloge na rukah budeju imali skupci. Kojem se pak ne bude hotelo iti vu cirkvu, znati bude taki da su podgarici, to je da vuloge ali škripce na nogaj imaju. A za Gonagrum iliti z vulogi na kolenu budeju posla imali oni koji po podiganjem i onda kad budeju videli mešnika z Božanstvom iti k betežniku, svoja kolena ne budu prignuti hoteli. Amantes postaneju amentes, to je: koji se preveč zaljube, oni pamet pogube. Koji ne budu hoteli prodečtvo i cirkvene navuke poslušati, očivesto znamenje bude da Othalgiu imaju iliti da je vuha boliju. Retina iliti mrena na oku naredi se onem zakonskem koji se nikak videti ne moreju. Na Cardialgiu iliti na srca bol budu se tužile one kavičarke (Kaffeeschwestern) kotereh dragi odideju za regimentom. Koji budeju imali zločestu vest iliti Conscientiu, oni budu koliki podvrženi. Glava bude bantuvala one koji se pri dobri volji spozabiju da quintum poculum de Klemlekensi ali de Monte Claudio več je cephalalgicum. Vu Miserere prepadneju one tužne matere koje z vnožinum drobne dečice kakti orgulicami prez muža ostaneju. A kad gdo komu reče: Redde, quod debes, to je: plati kaj si dužen, onda takvoga terjanoga na jenkrat hudi kašel, ako mu se pak još k tomu z ekselencijum iliti oglobum zagrozi, Catarrhus suffocativus, iliti zadušnica pograbi. (Danica zagrebečka 1841: 2–7)
Jednoč vu prijatelskem razgovoru bil je naš Martin opitan bi li kaj od dobreh lastovitostih zakonskeh ljudih znal povedati. „Nekaj po malo“, odgovori Martin, „kuliko zvun spoznanja ili veščnost suditi bi mogle za potrebnost takveh, postavemo ova sledeča: 1-vič zakonski ljudi moraju imati dobre zube da vse zgristi i pregisti moreju; 2-oč oni moraju dobre prste imati kajti višekrat čez prste moraju gledati; 3-ič moraju imati dobroga hrbta da budu mogli vsa podnesti; 4-ič moraju imati dobroga želuca da najtvrdeše zalogaje budu mogli prekuhati; 5-ič moraju imati dobra ramena da z njimi višekrat budu mogli dobro micati; 6-ič moraju imati dobre noge kajti njih višekrat čižme tišče. (Danica zagrebečka 1841: 60 – 61)